روبابيكيا

الأحد، 25 أكتوبر 2015

الكراسي زمان وأحلي جيل زمان .. أيام متتعوضتش !

ذكريات

الكرسي مانقرضش

لكن ساعات تشوف حاجة بتستعملها كل يوم من سنين كتييييييييير وفى لحظة تجلى

تلاقى نفسك سرحت فيها وافتكرت ذكريات مرتبطة بيها

زى الانتيكة اللى معانا النهاردة

الكرسى ده هو الكسى الوحيد اللى بيتميز عن باقى الكراسى لأنه الوحيد اللى ليه صوت و طعم و ريحة ..

- صوت رزع الدومينو ع الترابيزات , و خناقات البشر ايام الماتشات ..

- صوت يا صباح الخير ياللى معانا من الراديو فى ساعة صبحية .

- ورنة معلقة على طرف كباية شاى 3 مرات ساعة عصرية.

- طعم العناب البارد فى عز الحر .

- و طعم السحلب الدافى ف برد الشتا ..

- طعم ساندويتش الفول بتاكله على العربية الصبح أو الكبدة مجهولة المصدر اللى بتاكلها و انت بتدعى بالستر من مغص احتمالات حدوثه عاليه .

- ريحة دخان حجر معسل على شيشة بتقرقر .

- و عادم عربية شكمانها بيفكر , يفارق عربية قديمة بعد سنين عشرة.

كرسى تلاقى راحتك فى قعدتك عليه بالعكس و مسند ضهرك ممكن يبقى لحظة مسند دراعك .. و الوحيد برضه اللى بعد ما بيتكسر كل حتة مستقلة بيبقالها استخدام.

كرسى بتتهافت الناس عشان تقعد عليه من غير ما تكون طالبة لا سلطة و لاجاه..

كرسى صعب تلاقى زيه لأنه بيجمع .. مش بيفرق

Unknown تمّ النشر بـ 3:08 ص أضف تعليق

خناقات البنات زمان

ذكريات

حتى خناقات البنات واحنا صغيرين كان ليها سيناريو واحد

تبدأ بحركة الاصابع الشهيرة للخصام
وتنتهى حيث الصورة
يتنكش الشعر ولا شيتا فى زمانها
صيحات طرزان المتقطعة لاخافة العدو
وهوووووب
تلاقى مصارعة الاقزام ابتدت
مايمنعش عض وشد شعر مع النوم على الضهر وحركات عشوائية بالسيقان ولا بحيرة البجع
واتحدى حد يعرف يفض الاشتباك
الا بعد تفريغ الطاقة
وباااااااااااس
عياااااااااااااط هستيرى من الطرفين
يعقبه نوووووم الظالم عبادة
وتنتهى الملحمة
اللى بيخاصم يخاصم ربنا واللى بيصالح يصالح ربنا :D

Unknown تمّ النشر بـ 2:54 ص أضف تعليق

أفتكروا معانا العيد زمان واللمه الحلوة

إلعاب زمان

كان حلو اوى اوى وكنا بنستناه بفارغ الصبر

بالهدوم الجديدة والعيدية اللى بنحلم بيها من بالليل
والشعر اللى هيتعمل شكل تانى غير الضفاير والتوك الجديدة
وصوت التكبيرات اللى بيقشعر جسمنا

وفرحتنا بالبمب والصواريخ والبالونات والنضارات الآخر شياكة وطالعلها من الجناب ودان ارانب والوانها الفسفورية

لا ونلبسها من غير لا خشى ولا حيا مع انها فى حد ذاتها جرم فظيع
فاكرين بابا وهو راجع من الصلاة بجلابيته البيضا ومعاه عيديتنا والعاب لطيفة كده زى الكاميرا اللى بترش مية والمسدس والبالونات الطويلة المخططة وكيس البمب
عندنا فى بيتنا تقليد لازم نفطر فى العيد كبدة وممبار ضرورى

أفتكروا معانا العيد زمان ^_^
يارب تعجبكم <3

Unknown تمّ النشر بـ 2:51 ص أضف تعليق

زمن ميناتل وأحلي أيام حياتنا

ذكريات

- ومين مننا ما وقفش قدام ميناتل بالساعات ؟؟

- ومين فينا ما ضيعش فلوسه على كروت ميناتل ؟؟؟؟؟
- كنا بنقف وطابور طويل ورانا مستني دوره
اللى يخبط على ظهرك و يقولك خلص و اللى واقف يتصنط عليك
- كانت الناس ممكن تحل مشكلة عائلية فى الطابور ههههههههههه
- ميناتل ده خد مننا راقاااات قبل الموبايل ما يبقى ببلاش

كنت بلم الكروت المرميه واروح قصاد أي كابينه واجرب كارت كارت وكان بيطلع في كروت رصيد

قبلها كان تليفون بالعمله فاكرين قبل ده بسنين وكنت كتيير أخاف يطلع بايظ ويسرق منك العمله من غير مايكون حد رد عليك وساعات تانيه كنت أقفل الخط ألاقي فلوس كتيييير بتقع من التليفون ههههههه وكنت افرح اوي

Unknown تمّ النشر بـ 2:49 ص أضف تعليق

اجمل هدية التلفزيون اللي فيه صور الكعبة والمسجد الحرام والطواف

ذكريات

ولما نستنى الحجاج وهم راجعين ونقعد نستنى يفتحوا الشنط

علشان كل واحد ياخد هديته

دايما كان من نصيبنا (( صندوق الدنيا ))

اد الكف ويلف بينا الدنيا لف

مع كل صورة بالفها واتفرج عليها باحس انى فى دنيا تانية والخيال يشتغل والواحد يتخيل انه راكب الطيارة وبيتفرج على كل البلاد

Unknown تمّ النشر بـ 2:42 ص أضف تعليق

جيل الكونو وأجمل أيام حياتنا

ذكريات

(( تقول الاسطورة اننا بنشترى الكونو علشان الحتة دى ))
اما الواقع الاليم :-
ماما تديك الفلوس علشان تشترى الكونو
(( ايه ده ماما النهاردة راضية عليا ))
وبعد ما تشتريه من البقال اللى جنب البيت
وتاكل كووووووووول الايس كريم الل فوق بسرررررعة
علشان توصل للحتة دى بالذات
هووووووووووووووووووووووب
تهبط عليك ماما وتقولك هات بقى اكل انا الحتة دى
you feel like
(( المال تجيبه الريح وتاخده الهوااااااااااايل ))

Unknown تمّ النشر بـ 2:37 ص أضف تعليق

زمان والأن <دلوقتى لانش بوكس ولانش باج>

ذكريات

زمــــــان والأن

دلوقتى لانش بوكس ولانش باج

ونقعد نفكر المنيو ايه النهاردة فى السندوتشات وكمان ممكن ما يعجبهمش ويقولولك عايزين 10 جنيه نجيب سندوتشات من الكانتين

- مالها اكياس السندوتشات اللى كنا بنفتحها فى الفسحة وبكل فخر نلاقيهم مهروسين جبنة على مربى ونبقى عايشين ملوك

- ولما كنا نتبادل الساندوتشات مع بعض واللى معاه لانشون يبقى هو ملك الفسحة والكل عايز يصاحبه

- ويا سيدى لما المدرس يظبطك وانت بتاكل تحت التخته فى الحصة التانية من كتر ما انت مش قادر تصبر على حلاوة المربى بالفول المهروسين على بعض وحلاوتهم ههههههههههههه

لااااااااااااااااااااااااااااء

احنا اتضحك علينا يا عيااااااااااااال

انا بطالب برجوعى الحضانة وماما تعمللى منيو فطار وعشا وسحور وسناكس ونشيلهم فى اللانش بوكس ونحطهم فى اللانش باج وناكلهم فى اللانش تايم :D

Unknown تمّ النشر بـ 2:31 ص أضف تعليق

#أنــــا_من_جيـــــل !!!!

ذكريات

- أنا من جيل إيهاب توفيق ومصطفى قمر لما كانوا بينافسوا رجاء الجداوي على قصة الشعر اللي اسمها "قصة الأسد

- تتعض على دراعك الأسنان تعلم يرسم مكانها ساعة
- اللي كان بيخبي أعداد رجل المستحيل جوا كتاب المذاكرة وبيضحك على أهله ويعمل نفسه بيذاكر
- بيت باي بيت وجيم والمعاصر وسلاح التلميذ
- صرف فلوسه كلها علي الفيديو جيم
- كتاب المطالعة والمحفوظات
- محمود ايه ده يا محمود
- طول ما ندي ضهرنا للترعة .. عمر البلهارسيا ف جتتنا ما ترعي
- القناة التانيااااااااااااه ........ شانيل تووو
- المعلم رشدان ونيسان
- بستك نووو.. شوكالاته جيرسي واكلة الجووو
- التفتيش على الضوافر الصبح فى الفصل
- لزق آخر صورة في الألبوم أمتع بكتيييير من الألعاب ثلاثية الأبعاد
- الأي سي كيو (ICQ)، النابستير ، الدايال آب 28.8 ك.ب في الثانية، و 09990777
- تجليد كل الكتب بالجلاد البنى
- شرايط فيديو و شرايط كاسيت وبنصور افلام تتحمض ونطلع صور نصها إتحرق
- نتكلم قدام المروحة المكتب وصوتنا يبقى مجسم
- الأتاري، واللي نص مصروفنا كان يضيع فى شراء الشرايط والدراعات بتاعتها

أحلي وأجمل جيل

Unknown تمّ النشر بـ 2:28 ص أضف تعليق

السبت، 24 أكتوبر 2015

أعوام 1950، 60، 70...... وحتى الـ 80

إلعاب زمان ذكريات

أعوام 1950، 60، 70...... وحتى الـ 80

مواليد 1990 غير مدعوين معانا (( وماتزعلوش )) هنزل ليكم مقالات ^_^

..................................

- احنا اتولدنا وعشنا بشكل طبيعى ... مع ان امهاتنا كانوا بياخدوا اسبرين وبياكلوا عادى من غير موانع ولا تحذيرات

- كانوا بيشتغلوا كموظفات او ستات بيوت لاخر يوم فى الحمل

عمرهم ما كانوا بيتابعوا ويعملوا اشعات وتحاليل

- ما لبسناش البامبرز

- كنا بنركب عربيات اهالينا من غير حزام امان

- شربنا من مية الخرطوم اللى بيسقى الشجر فى الجنينة والنادى

ماكناش بنشرب مية معدنية من السوبر ماركت

- وكنا بنشرب كلنا من ازاة واحدة عادى (( ما جرالناش حاجة ))

- اكلنا جيلاتى من الشارع ولوليتا واتهرينا الوان مش عارفين كانت معمولة من ايه

- اكلنا العيش الفينو والابيض والزبدة البلدى

- وشربنا الكولا وكلنا مصاصات ولبان وبونبون وشيكولاتة

- وماكناش اطفال تخان ولا بروطات

- لاننا دايما كنا بنلعب غالبا على بسطة السلم او على الرصيف قدام البيت

- نخرج مع اخواتنا وجيراننا نلعب استغماية ونط الحبل واولى وكورة وشد الكبس كهربا وكيكا عالعالى وعسكر وحرامية ... من الصبح لحد المغرب

- ماحدش كان بيخاف على عياله وممكن امهاتنا يخلصوا كل اللى وراهم من غير خوف وقلق علينا

- قضينا ايام نبتكر ونخترع سكوتر بتاع زمان من الكازوز والخشب القديم ، ونبنى بيوت بعيدان الكبريت ، وركبنا الكراتين بتاعة البقال اللى تحتنا وكنا بنزق بعض فى منزل الشارع

- وكنا اطفال حوادث دايما تحت الدقن متخيط ويمكن كدمات فى الركبة والكوع او سنة مكسورة

- عمر ما اهالينا منعونا نلعب بعدها مع بعض او جالهم حالات هلع من اصابات الشوارع

- ماكانش عندنا صحاب وهميين عالنت .... يمكن صحاب خياليين بنلعب معاهم لما نكون قاعدين لوحدنا

- ماكانش عندنا نشاط مفرط ولا كسل مفرط ولا مشاكل فى التركيز فى المدرسة

- ماكانش عندنا غير قناتين فى التليفزيون وكام اذاعة معدودين عالصوابع وكنا بنستمتع بكل حاجة بتتعرض عليهم

- كان عندنا صحاب من اى جنس واى دين

- اتخانقنا مع صحابنا ويمكن ضربنا بعض وشدينا شعر بعض عمر ما اهالينا اتخانقوا بسببنا

- ال 50 سنة اللى فاتت كانت الأكثر إنتاجا في تاريخ البشرية

- أجيالنا أنتجت أفضل المبدعين.... حتى يومنا هذا.

- كان عندنا الحرية، والانطلاق

- كان عندنا الحق في الخطأ والاعتماد عالنفس مع بعض التبريق والزغر والجز عالسنان والتوجيه (( ما يضرش ))

- كان عندنا الاصرار وطعم النجاح والمسؤولية